काठमाडौं, जेठ १२ गते । चीन सरकारले नेपाललाई थप १० लाख डोज कोभिड १९ खोप अनुदानमा उपलब्ध गराउने घोषणा गरेको छ । चीनले यसअघि नेपाललाई ८ लाख डोज खोप अनुदानमै दिएको थियो ।
नेपालका लागि चीनका राजदूत हाउ यान्छीले ट्वीट गर्दै दुई देशका राष्ट्रपतिबीच भएको संवादका आधारमा चीन सरकारले एक मिलियन डोज खोप उपलब्ध गराउने घोषणा गरेको जानकारी गराउनुभएको छ ।राष्ट्रपति विद्यादेवी भण्डारीसँग बुधबार भएको टेलिफोन संवादका दौरान चिनियाँ राष्ट्रपति सीले उक्त प्रतिबद्धता जनाएका हुन् ।
यसैबीच आजै चीनियाँ कम्युनिष्ट पार्टीको अन्तर्राष्ट्रिय विभागले नेपालका राजनीतिक दलका नेताहरुसँग भर्चुवल अन्तरक्रिया गरेको थियो । सो अन्तरक्रियामा नेपालका उपप्रधानमन्त्री ईश्वर पोखरेलसहित दलका नेताहरुले कोभिड १९ संक्रमणकाबीच नेपाललाई चीनले गरेको सहयोगको धन्यवाद व्यक्त गर्दै थप सहयोगको आग्रह गर्नुभएको थियो ।
